ارحم لحالي يا بعد كل حالي=غيبتك عني سممت حلو الأحلام
ما عاد يهناني منام الليالي=ولا هي تسليني جميلات الأيام
أقضي كثير الوقت قاعد لحالي=من حر مابي أقرع إصباع ببهام
كل ما ذكرت يابعد كل غالي=هاض القصيد ومنك قافه والإلهام
ما بين حلو ومر صار وجرى لي=أتعبت منظوم القوافي والأقلام
ماضي هوانا ما يفارق لبالي=وحاضر تباعدنا قسم قلبي أقسام
أون وأضحك كن فيني هبالي=عيني تلد خلاف والدرب قدام
ودي يعودن الليال الخوالي=وتعود لي وأعود لك فرحة أعوام
ترجع بشوقك والغلا والدلالي=وأعود لك فارس ومغرم وضرغام
أرمي على كفك هموم اعتلالي=وأخذ مواجيعك وهمك والأسقام
تطفي لهيبٍ(ن)بالمعاليق صالي=حرم علي النوم ما بقدر أنام
طيفك يهبه مثل هب الشمالي=تشعل لجمر الشوق ذاريت الأنسام
أنا وطيفك والسهر هم لالي==تصدر علي أحكام وتنفذ أحكام
ارحم لحالي يا بعد كل حالي=غيبتك عني سممت حلو الأحلام