يازين صوت اللي على السمع عدت=صوتٍ(ن)فتني حيل ماهو بعادي
تلعثمت في حكيها حين ردت=مدري حيا والا حداها حوادي
سمعتها ما شفتها حين لدت=لو شفتها ضميتها بالأيادي
لكنها كلمة من الزين سدت=سلمت من شرور الزمن والأعادي
ياليتها ما كان بالحال صدت=لكنها قصت حبال التمادي
وانا غرامي صعبةٍ(ن)لن تحدت=ايزيد معها بالتحدي عنادي
لو هي قريبة خمس ما كان عدت=حطيتها فوق النحر والثنادي
مهما عليًِه بالعناد استبدت=مصيرها ترضخ واحقق مرادي
مير المصيبة فالمقادير ودت=كل واحدٍ(ن)منا غدى في بلادي
طول المسافة والظروف استشدت=حطت عليه ياغرامي قيادي
احلام شاعر جابته ثم ودت=ما ثابني حلو الشعر واجتهادي
اللي بنيته في سويعات هدت=ما نلت منها غير طول السهادي
كل ما بغيت أنسى علي استجدت=معي ترافقني مروح وغادي
لا هي تعشيني ولا يوم غدت=لكن على رب المخاليق زادي
يروي عروقٍ(ن)بالحشا ما تجدت=يلطف بها رب البشر ولجمادي
يبري جروحٍ بالمعاليق قدت=عرق الخفوق ولا لهن ضمادي
بأسباب صوت اللي على السمع عدت=صوتٍ(ن)فتني حيل ماهو بعادي