يا بنت ياللي بالعنا تدرين=في حبك الأحلام مرهونه
تجتاحني ما بين حين وحين=افكار نارية ومجنونه
ودي أحطك خلف رمش العين=وأحبسك وسط الموق في نونه
وليا سألتي قلت ما تدرين؟=هذي طريقة عشق مضمونه
من شأن عندي للأبد تبقين=وأبعدك عن ناس ملعونه
قالت: دخيلك فكني ياشين=تبغاني ابقا دوم مسجونه
قلت:العفو ماهو سجن يازين=من شأن تبقي دوم مصيونه
محدٍ(ن)يشوفك وأضمنك تبقين=عندي الي تبقي مزيونه
قالت:ياعوذا ما بقلبك لين=طول العمر بكون محضونه
ما فيه عندك حل بين وبين=وأكون لك يا خيّ ممنونه
دور لحل يريح الأثنين=أنته وأنا والناس مشيونه
قلت:اسمعي لن كان لي تبغين=هذي حلوم بعود مدهونه
أحلام ليل إن كان ما تدرين=وفي حبك الأحلام مرهونه
ما قلت لك يا ناعم الخدين=تجتاحني افكار مجنونه