حاولت اسلي خاطري وأتناساك=لكن طيفك ضيع محاولاتي
في كل فكرة يا بعد قلبي القاك=كل المشاعر تفتديك بحياتي
كل نبضةٍ(ن)بالقلب فيني بتهواك=من مولدي اهواك حتى مماتي
عسى العذارى كلهن من فداياك=يا بسمة ايامي وكامل غناتي
ايام عمري ما تساوي بلياك=يا قاهرة بالحسن كل البناتي
في ذمتي ما عشت ما بقدر انساك=أذكرك حتى في سجود الصلاتي
أذكرك لا من شافت العين لسواك=القاك كلك ساكنٍ(ن)كل ذاتي
ليلي وصبحي كلهن تسمع خطاك=في داخلي عايش صباح ومباتي
واقع هوى في داخلي وأتمناك=ما عدت يابعدي من الذكرياتي
أراك لو إني من البعد ما أراك=هواك في دنياي كل حسناتي
أدور من حولك مثل دور الأفلاك=مجموع فيك ومنك حاصل شتاتي
مقدر أعيش بدون حبك وطرياك=أهواك في بوح الهوى والسكاتي
قلبي وعقلي كلهن تطلب رضاك=ما غيرت بالعشق يوم لوصاتي
عين الرضا ما تبصر إلا مزاياك=حاضر ومستقبل وما كان فاتي
أهواك ثم أهواك وأهواك وأهواك=وشلون ما بهواك وأنت الغلاتي
كلي على بعضي فادايا لعيناك=في صحوة الأيام وإلا سباتي
اللي بقا من عمر بقضيه وإياك=إخذي بقايا العمر من غير هاتي
أعاهدك ما عشت ما والله أسلاك=لين الجسد يصبح حطام ورفاتي
ماني مسلي خاطري وأتناساك=قلبي وفكري تحبط محاولاتي