شهر وقلبي من مواجعه ما فاق=ضاعت تدابيري وضاعت سنوعي
من ساعة المغرب ليا وقت الاشراق=الليل كله متكي فوق كوعي
اون لين الصدر من ونتي ضاق=النار تشعل خلف عوج الضلوعي
الشوق يا.... ما عاد ينطاق=العين تمطر من غزير الدموعي
هواك صار النبض في جوف الاعماق=والقلب يشكي من حرايق تلوعي
غيرك من الزينات للقلب ما لاق=مالك شبيهن في جميع الربوعي
هواك يا عز الطلب حيل سراق=سرق لروحي يا حسين الطبوعي
حالي بعد غيبتك مدعاة الإشفاق=الجسم ينحل والمشاعر تروعي
وأنا اشهد إن الحب للقلب حراق=أشد من نارٍ(ن)تذيب الشموعي
بالذات لامن حس به ريحة فراق=يخشى فراقٍ(ن)مايعقبه رجوعي
كن الجبال الراسية فوقه أطباق=هواجسٍ(ن)للقلب منها جزوعي
وأنا وقلبي والعنا دوم بسباق=من ليلة الجمعة ليوم الربوعي
نركض ورا الأحلام والطاق بالطاق=يوم وشهر وأسبوع عقبه سبوعي
عانيت مر الصبر ما عاد ينذاق=لكن كريم الوجه ماهو قطوعي
يلطف بحالي عقب ماصار منعاق=كني خلاوي وسط كل الجموعي
بالفكر هوجاسٍ(ن)وفالعين براق=طيفٍ(ن)يراودني ويشعي لشوعي
أسترحم المعشوق والقلب مشتاق=ماكن ربي قد خلق له سموعي
متى يجيني صاحب الطيف برفاق=ينهي للوعاتي ويطفي لجوعي
نحيا سوا عشاق ونموت عشاق=نروي مشاعرنا بعذب النبوعي
قدام لا نحمل على متن الأعناق=ونموت بالحسرات من كل نوعي
شهر مضى قلبي من الشوق ما فاق=ضاعت تدابيري وضاعت سنوعي