فقدت الهنوف اللي عطتني بلا منَّه=عطتني مشاعرها وأنا صرت شاعرها
هواها سكن للقلب فرضٍ(ن)على سنه=وجتها لحون الشعر تشعل مباخرها
قصيدي على شأن الغلا سامر لجنه=سنينٍ(ن)طويله كل ليلٍ(ن)يسامرها
يواكب ظروف الوقت بالفرح والونه=جميل القوافي قلتها في منابرها
هواها بقلبي يظهره مر ويكنه=غرامٍ(ن)بدنيا العشق محسوب نادرها
رضاها عليَّه باب مفتوح للجنه=لكن بُعدها نارٍ(ن)شوتني بساعرها
ليا منها زعلت يجي بالصدر ظنه=تنكد على روحي هجوسٍ(ن)تشاطرها
أبات الليالي مثل من طاوله سجنه=ليال السعد ما تنقذه لو تذكرها
حمسني هواها حمسة الجمر للبنه=حلومي بنار الصد خلي مدثرها
أقلب لمسباحي تسلي بلا حَسْنَه=وجوفي هموم الليل بالصدر قابرها
أدور عذر لغياب من شاقني فنه=ولو كان ماش اعذار بقول:عاذرها
هواجيس تلعب بالفكر جا لها حنه=تشاغل لبالي حائرٍ(ن)في تدبرها
ليا صار ماش أسباب مني ولا منه=جميع الظنون أفكار روحي تحيرها
بعد ما فقدت اللي عطتني بلا منَّه=هجوس الليالي طيرت نوم شاعرها