يا هاجسي هات القنا هات السهم=هات الجزيلة بالخفا وإلا بياني
هات السمينة بالصحن قلط شحم=كرمان للي بالقصائد ما شناني
بندر رفيع الشأن عالي كالعلم=لا طب ميدان الشعر مثل الحصاني
يجمح جموح الخيل يبني ما يهدم=بالكف سيف وبالفكر رمح وسناني
مثل الصقر لامن تعلا للقمم=يشلع بمخلاله ولا يبغا رهاني
وقتٍ(ن)مضى من حول زمزم بالحرم=رغم القسا شربت من نبع القرانِ
واليوم زان الوقت والشين انهزم=زانت ظروف الناس من قاصي وداني
مير الشباب أقفا بعد عدله ظلم=تغيرت أحوالنا والعمر فاني
الضعف ينخر بالعزيمة والعظم=نسيت بعض اللي كتبه التلمساني
الساق ما يثبت ليا ضعف القدم=واللي حدا بندر بوقته قد حداني
حكم الزمن قاسي ليا منه حكم=وأصدق خبر ماهو نشوفه بالعياني
يا بندر الجودي تعلمنا حكم=بالحكي هزل وبالحكي جزل وسماني
والخاتمة ياصاحبي قسم قسم=ماني بناسي صاحبي لو هو نساني
مقداركم عالي على راس الخشم=حق الخوي ما ننقصه وانا فلاني
طالبك لامني طلبتك قول تم=ليا جئت مكة مرنا لو هي ثواني