سلام للي بيني وبينه أميال=عبر الفضا مني سلام ورساله
أنشد عن الأحوال وشلون الأحوال=رد الجواب بصوت وإلا مقاله
وإلا بخط اليد وإلا بجوال=وإلا بتويتر وأرسله بالأصاله
ياصل جوابك عجل صوتي ومرسال=عساك دوم بخير بيته وقاله
إلا ليا من كنت ماني على البال=معذور ماني متعبك بالجماله
ما يرتوي عطشان من مقفي خيال=حتى لو إنه بالركايب سعا له
بقنع وبلقا بالزمن طيب الفال=على الفكر يفتر فر المحاله
ها ثم يبشر بالوفا عهد رجال=مبعد عن دروب الردى والنذاله
ماني بطفلٍ(ن)يعجبه لعب الأطفال=مثل الذهب ما ينعرض بالبقاله
أهتم بالأفعال قدام الأقوال=أبوي علمني علوم الرجاله
والحكي حكي ولا يساوي للأفعال=ما يكسي الرجال ثوب الشكاله
مهما يدور الوقت من حال لا حال=تبقى الشهامة بالنشاما أصاله
أطول للي صعب ماهو بينطال=من فضل ربٍ(ن)متصف بالجلاله
الحر فعله ما يشابه للأنذال=والخبل ما يترك فعول الخباله
ما يعجب لعمه ولا يعجب لخال=كل ما لقى له خبل مثله حكى له
نقال قبل الناس تعرف لنقال=خفيف عقل ولا يعرف الثقاله
سلام للي بيني وبينه أميال=عبر الفضا مني سلام ورساله

راااقت لي الابيات شاعرنا بن هليل

مميز دوم و كل يوم