يا جميل الصفات القلب رحب وهلا=فرحتي حين جئت وعزة الله كبيره
استراح الضمير وزاد نور المحلا=زان جو القصيد وفاح لأجلك عبيره
ما نظمت القصائد فيك لأجل أتسلى=قلتها مدح مني بالهنوف الأميره
فيك كل المحاسن يالصغير المحلا=منك كل السهام المرسلات الخطيره
الهوى يا غرامي حدني وإستحلا=قلبي اللي سكنته يا جميل السريره
كل يومٍ(ن)غرامك بالفؤاد يتعلا=صار حبك بقلبي قبل حب العشيره
سحر لونك وذوقك تلني الك تلا=غير باق الصفات النادرات المثيره
جامعه للمفاتن من نعم لين كلا=صعب تحصي مزايا فيك حلوة كثيره؟
من بنات الشمال ليا بنات المكلا=تستحل الصدارة في بنات الجزيره
نورك أشبه بنور البدر لا من تجلا=بليلةٍ(ن)مقمرة والجو صافي منيره
خاطري من حضورك يالغضي إسمهلا=طاب ليلي وطابت للغرام المسيره
المشاعر تراقص للفرح ما تملا=عقب لوعة سنين طوال مرت مريره
الفرح حل والحرمان والهم ولى=الله اللي جبر كسر القلوب الكسيره
فاح عطرك بجو الليل والخير هلا=المزاج إعتدل من عقب طال تعكيره
ليلةٍ(ن)تنحسب ليلة عمر ما تخلا=ما يفوت ليال الأنس ثاقب بصيره
يا جميل الصفات القلب رحب وهلا=فرحتي حين جئت وعزة الله كبيره