الفاتن اللي حققت لي مكاسب=منها تعلمت الغزل واللطافه
غازلتها بأجمل صفات ومناقب=نبض القصيد اللي نظمته حرافه
ناديتها بالصوت عيت تجاوب=ماهو جفا لكن بعد المسافه
أدري حداها البُعد والبُعد غالب=بالذات لا من صار فيها كلافه
على الحبيب اللي له القلب طالب=النبض يشتاق له والحب لافه
الشوق يغدي سبع مبرز مخالب=يجرح شعور العاشق بلا خيافه
لا من بغا له من حبيبه مطالب=والبعد حايل بينهم يا حسافه
أعد هذي من كبار المصايب=تثر على جسم المولع نحافه
وأغرب غريبة في زمان الغرايب=الحب لا من صار فيه انحرافه
صاحبه يبقا طول عمره محارب=بالفكر رجف وبالفؤاد ارتجافه
ما ينفعه علمه وكثر التجارب=درب الهوى ما هو صري من لقافه
أحيان مثل الشهد قرب الحبايب=وأحيان مثل السم هجر وصلافه
طعمه لذيذ ومتعته بالمتاعب=متقلبٍ(ن)بين القسى والريافه
ياما فعل بأرواحنا من مقالب=فيه المواجع والدوا والطرافه
دين الهوى من عانقه صار راهب=يؤمن بمفعول السحر والخرافه
يدعس على جمر الغضا ما يحاسب=دامه يعاني من حبيبه خلافه
الفاتن اللي حققت لي مكاسب=منها تعلمت الغزل واللطافه