ياساكنٍ(ن)بالمجمعة ويش الأخبار=كانك نسيت أنا بعد ما نسيتك
اذكرك واذكر صورتك يا بن الأحرار=وإلا نسيت إني بعيني رأيتك
ماني بناسي زين شافته الأنظار=حلمت في حسنك زمان ولقيتك
وشلون بنسى وأنت ما كنت مرار=وياليت ما في يوم قلت اهتويتك
رسمت لك صورة على القلب تذكار=تبقى معي لو غبت ثم ما لقيتك
بثيت لك صورة على كل الأقمار=أقمار فكري في فلكها حويتك
تباعدت أقدامنا والزمن دار=لأنا رويت ولا أنت مني سقيتك
وكان الغياب المر من غير معذار=ما بدها على الحكومة شكيتك
بكتب لهم وصفك على كل الأشعار=وعلى المظالم والقضاة إدعيتك
دعواي قلبي رحت به غصب وضيار=هددتني بسيوف رمش وعطيتك
وثاني دعية بدعي أنت سحار=سحرتني من عقب ماني عصيتك
ومن غير مدري صرت مشغل للأفكار=نهبت قلبي بالغرام وفديتك
أسامر لطيفك ليا وقت الأسحار=هدمت غيرك بالفؤاد وبنيتك
يشعل غرامك داخلي كنه النار=بدمع القصايد في لحوني بكيتك
يا ساكنٍ(ن)بالمجمعة بعد الأسفار=بنشد عنك وادور اهلك وبيتك
بزوركم والزين والدار تنزار=من شأن تعرف صدق حبٍ(ن)حبيتك
وليا لقيتك قلت لك كل ما صار=من حين شفتك لين جئت ولفيتك
بشرح لك القصة وبين لك أسرار=متى وكيف وليش قلبي هديتك
ياساكنٍ(ن)بالمجمعة ويش الأخبار=كانك نسيت أنا بعد ما نسيتك