دامك كذا ما أنته بقادر تجرا=خلك بعيد وخلني عنك بعيد
تعبت وأنا بنتظر واتحرا=أحسبك مثلي صادقٍ(ن)بالمواعيد
أشيل جرح الحب بحرٍ(ن)وبرا=ما بحت به لأنذال وإلا لأجاويد
كل مالعب بي هاجسي قلت مرا=أراقب لجيتك وأعدها عيد
يجمح حصان الفكر فرٍ(ن)وكرا=والحلم يرقص داخل الجوف ويشيد
حتى هلكت النفس شوقٍ(ن)وحرا=واللي مضى بالأمس كل يوم بتعيد
بين الرجا واليأس حلمي تسرا=للهاجس اللي عنك بالليل ما يهيد
طيفك شريط الفكر فيني يفرا=كل ما أنتهت مدته زوده تمديد
ما شفت من جانبه حالٍ(ن)يسرا=إلا المواجع والعنا والتناهيد
الواقع المشهود للوضع عرا=كشف لي المستور من دون تقييد
رميت فوق الجرح نارٍ(ن)وشرا=والهم يكبر والمعاناة بتزيد
ماني على الهجران قبلك مضرا=ولاني على ذل الهوى منك امفيد
ياللي غرامك في فؤادي تذرا=وتجدد الهجران والصد تجديد
هواك جوف الصدر كنه مغرا=غلفت به قلبي سواة التجاليد
تركتني للبرد والشمس برا=سويت فيني كل ما ودك تريد
مهدت لك قلبي وضمك بسترا=واليوم أشوف الحال داخله تنكيد
فرشت لي بالأرض نارٍ(ن)وجمرا=ماكني اللي كنت لك بالهوى سيد
ماباقي إلا من وجودي تبرا=ياقدرة الله كيف عن عهدي تحيد
وشلون تجزا للمنافع بضرا=هذا التصرف خالف لمنهج الغيد
كنك تمنى تذبح لقلب برا=برك بحبه مد من دون تحديد
لله درك صدق لله درا=شيبت في حبٍ(ن)كسته التجاعيد
دامك كذا ناوي لذلي تجرا=خلك بعيد وخلني عنك بعيد