ياليل وينه مشغل القلب ياليل=طول غيابه والمشاعر تناديه
سرى علي الشوق والهم والويل=ياليتني ياليل دبلة بأياديه
له مدةٍ(ن)قاطع لكل المراسيل=للشاعر اللي بغالي الروح يفديه
وشلون ينسى لهفتي والتعاليل=والا حداه ظروف ما عاد يمديه
ياليل قبل خدها حيل تقبيل=قل للغضي شاعرك للخد مهديه
بلغه عن حالي بكل التفاصيل=قل للغلا عهد الوفا في مباديه
ماني بمن يخلف لفعلٍ(ن)ولا قيل=زاد الزمن وإلا نقص في تحديه
مهما بلغ بي من صنوف الغرابيل=عن كل خلق الله فؤادي مبديه
وإن رد لك مردود هاته بتعجيل=قدام يطلع نور بكره ويغديه
ترى المشاعر ما تحمل لتاجيل=لن هاجت بقلبٍ(ن)مولع بترديه
ياحلوها لا جات نشوى مقابيل=ترقص بفكرٍ(ن)جاير الوقت حاديه
وياشينها لا من تقافت مداهيل=حلم العمر جمر المواجيع ينديه
ياليل وينه مشغل القلب ياليل=طول غيابه والمشاعر تناديه