الصبر يا فيصل بعد وفرته قَل=من غيرتي والعقل مع غيبته غاب
على عشيرٍ(ن)بالعذارى مفضل=ساكن بموق العين ما بين الأهداب
من بدهن عندي غدى الكل بالكل=مقوى زعله ولا أتحمل به إعجاب
تقدير لإحساسه ولا أبيه يزعل=ضغطت فوق القلب وأتلفت الأعصاب
أكذب عليه وقلت له:بي تحمل=ومشاعري اتقول لي أنت كذاب
كابرت لين القلب من كِبري إنعل=وأنا أدري بعلته وأعرف بالأسباب
يا قلب ياللي بالهواجس مغربل=صبرك على همٍ(ن)مع الدم منساب
واصل لمشوار التحمل وكمل=أنا وجزل الهم يا قلبي أنساب
عل الليالي بعد عسرٍ(ن)تعدل=والا تروح الروح والجرح ما طاب
يا قلب ودي بالزمان أتجمل=ما ودي أكدر خواطر للأحباب
مهما كبر همك وفوقك تفصل=ترى الصبر للضيق يا قلب غلاب
لا تلتجي بالضعف وإلا توسل=خلك كبير ولا تشاني للأقراب
حبل الرجا لا تقطعه لن توصل=باب الأمل مفتوح من بد الأبواب
لا من عطيت العهد حاذر تبدل=ترى الوفا بالعهد من حق الأصحاب
صاحبك لا تحرجه وإلا تبهذل=تِفرح عليه من المخاليق الأغراب
كثر العتاب من المحبين ينمل=أثره يبقى ما تشافيه الأطباب
خلك كما ماكنت يا قلبي أول=الصبر زين وشاري الصبر ما خاب
لكن يا فيصل بعد وفرته قَل=من غيرتي والعقل مع غيبته غاب