يالله تهونها على ساهر الليل=يتبع هواجيسه من السيف للسيف
مرٍ(ن)يعدلها بشعر وتماثيل=ومرٍ(ن)يعدلها بفنجال من كيف
يازينها لا جات عجله مقابيل=وياشينها لا صار حيفٍ(ن)على حيف
أصوغ منها الشعر عدلٍ(ن)بلا ميل=وأختار للطاروق زين المحاريف
حلو القوافي تجلي الهم وتزيل=عن خاطري ما يشتكي من تحاسيف
اما حرفت القاف يم الرياجيل=والا حرفت القاف يم المواليف
أزن لهرجي لا يجي فيه تاويل=العلم ياشينه ليا جاه تحريف
أقرر الميزان وأرجح الكيل=والبحر ما ينقصه نسف المغاريف
من فكري اللي ما تتبع لأقاويل=بنات فكري والمعاني تصانيف
ليا قاده الهوجاس جتني مداهيل=جزل القوافي في جميل التواصيف
أختار منها طيب الفعل والقيل=وأبعد عن علوم الخرف والتخاريف
يالله تهونها على ساهر الليل=يتبع هواجيسه من السيف للسيف