يا هاجسي / ارسم ملامح دعابه= واطلق صخب بسمه على جــّو الاحباب
من شان عين اللي تعب في شبابه= حاول / عسى يضحك من الناب للناب
واكسر قيودك يا سجين الرتابه= بس الحذر .. لا يصلبونك بمصلاب
السالفه : يا ليل / حزني زهابه= ما همني جورك وشمعك ليا ذاب
شايب صدم في بنت فيها ذرابه= حاول يبادر للبنيه بالاعجاب
واثر البنيه ما تطيق الشيّابه= وهو يعــّـد الشيب فاتن وجذّاب
قالت يا عمو .. قال مغرم صبابه= قالت وجع .. قال: ايه بالحيل منصاب
قالت بلا .. قال البلا / بي نصابه= ردت تأفففف له .. وهو خاطره طاب
شانت معاها .. بين ضيق وغرابه = ذا الشايب العاثر بعد ما كبر عاب؟
قالت توكّل .. قال قلبي عذابه = طاف الضلوع وطال عينين واهداب
قالت ترى عزوة عيوني ذيابه = لولاك شايب جوك مغليني احزاب
قال الفضا / فيه الصقر والذبابه = وآنا كفو لا يخدعك وسم الاتعاب
اقنص عنود الريم واتقن صوابه = واذا فتحت الباب من يقفل الباب؟
اهناه في ليل ن عشيري هنا به = واقتل يهود الشوق لو قالوا ارهاب
واعرف لزوم المرجله والقرابه = وافي معى ربعي وجاري والاغراب
عندي ثلاث ورابعتهن مصابه = في ساقها كسرين والدمع صبّاب
طلقّتها .. واصبح كياني خرابه = دعت علّي .. وسهمها بالعنا صاب
والحين قلبي جاك حاسب حسابه = مبداه شرع الله وبالطيب طلاّب
ماشي على هدي النبي والصحابه = يسعى لقربك صدق ما جاك كذّاب
قالت يا ابو عكاز من أي / لابه؟ = وكم رصيدك بين مكتوب وحساب؟
وان كان لك ثروه ولا انتا زلابه = هذي شروطي دون تفصيل واسهاب
ابي قصر ديلوكس ما فـّك بابه = وابي الحرس من دار عكفان الاشناب
وابي الخدم من مصر وآديس بابه = وابي الذهب يملا ثلاثين دولاب
وابي المواتر غاليه ما تشابه = معها ونيت وشاص وردي وقلاّب
وابي حديقه تحتوي الف دابه = في وسطها بيت الشعر ما له اطناب
وابي السفر من عقب مكه وطابه= في ديرةٍ ما حولها عج وتراب
ننسى عنا الديره وجوع الغلابه=ونعيش حريّه مع الجنز والكاب
ولا عاد نبلش بين زير وربابه = الا بعد ما نرقص البوب والراب
ذهاب ما يفرض علينا ايابه = في طايرتنا بس انا وانت ركّاب
قال القبيله خندفي من شبابه = كريم وافي دوم للنار شبّاب
لكن شروطك سببت لي كئابه = لأن الفقر يا بنت الاجواد حطّاب
يفنى الموظف في مطارد سرابه= وبالتقاعد ظن حلم العمر خاب
واللي حصدته بعد طول الشقا به = ساهمت به واقفا معى فتحة القاب
ردت له انعم كلن اسمك يهابه = لكن يا ابو عكاز شرواك نصــّااااب
يعني على شيبتك لو ما انت آبه! = تبي حلاي؟ومسكنك حفرة الداب
ياللي قرب حتفك وحظك / غرابه = نعق بشوم الفال من راس مرقاب
حكمك صدر / يزهاك حد الحرابه = لا عاد تاقف للغنادير حـــّـراب