بإسم ربعي وبإسمي جد مافيه زيف=عزوةٍ(ن)ماخلطها بالزمان جلوي
نبتدي بالشكر لله ربٍ(ن)لطيف=بكل ماهو نطق به باللسان لغَوي
ياضيوف الفرح من كل حدبٍ(ن)وسِيف=المكانة رفيعة لحْضري وبدوي
ياهلا مرحبا حقٍ(ن)لجارٍ(ن)وضيف=مثل ماهي بحق(ن)لإبن عم وخوي
من شرورة جنوب ليا ضواحي طريف=التراحيب تشمل منطقي وجهوي
ومن سواحل تهامة لا ربوع القطيف=مرحبا ياضيوف من الزوي لزوي
في محلٍ(ن)يقدم للمناعير كيف=بنٍ(ن)أشقر على حسب الطلب مستوي
والمواجيب واجب للقوي والضعيف=مانوخر ضعيف ولا نقدم قوي
الضيافة لها حقٍ(ن)لضيف ومضيف=مثبتٍ(ن)في عوايدنا ونهجٍ(ن)سوي
ضيفنا له ثلاث أيام شيخٍ(ن)عريف=في محلٍ(ن)رفيعٍ(ن)يطعم ويرتوي
من بعدها يصير الضيف جارٍ(ن)شريف=نحشمه ونتجاوز عنه كانه غوي
جالنا للعوايد مد ماهو قصيف=درب الأمجاد بين ما يجي ملتوي
من قديم الزمان الأصل ثابت نظيف=ساس طيب وبيتٍ(ن)للكرم محتوي
ماتهزه رياح ولا يعصفه عصيف=شامخٍ(ن)ما يناله بالردى منتوي
ياجبل ما تهزك ريح دامك منيف=في ربوع الحجاز لعزها مهتوي
الأحبة لفوك وحوطوا بك لفيف=الفرح حل وكبود الحسد تنكوي
ربعت دارنا والفصل محسوب صيف=ياعسى حبل من واصلك ما ينطوي
يا محلٍ(ن)بنورك شاف منهو كفيف=دام عزك نجومك ساطعة ما تهوي
وياعقود الفرح نورك مع الليل شيف=المباخر بها عود أزرقٍ(ن)ينشوي
اكتمل فرحنا بحضور ربع وحليف=دامت أفراحكم بدوٍ(ن)حضر وقروي
ياهلا مرحبا حقٍ(ن)لجارٍ(ن)وضيف=مثل ماهي بحق(ن)لإبن عم وخوي