مابقا ماهو نقول ولا بقا ماهو نمده=دامت إن اللي مضى ماغيرك مثقال ذره
الأمر لله ما نقوى عليه ولا نرده=مابقا إلا يقيني بالقدر خيره وشرة
الغرام اللي عرفته شد حيلي ثم هده=إنفجر شريان قلبي من بلا نزفه وحره
المشاعر تنزف بروحي رخاها صار شده=والحلوم تموت بالأفكار يامضنون غره
كل ما فكيت بابٍ(ن)للأمل هجرك يسده=لين صرت أعشق وهم روحي غلب لله دره
صارت أوهامي على روحي طغاةٍ(ن)مستبده=كاذبة أوهام فكري ما صدقت لو كان مره
راح عمري بين صبر وبين جمر وبين لده=صوب سابيت الفؤاد وحاجبه عن المسره
إن عتبت وقلت:وينك قالت:الأيام نكده=وإن دلهت وقلت:بنسى حبها بالقلب فره
يرتجف من حب خلٍ(ن)لو قطع بعده يوده=مستحيل يحل غيره داخله لو كان ضره
الوفا مني لخلي والعهد ما أبيح سده=لو أعيش العمر كله كن بالخفاق جمره
بتلمس له عذر لو كان مابه شيء حده=التغاضي عن قصور الولف نوع من المبره
يافؤادي دام تمشي مشها والعذر عده=لا تكدر خاطري باللوم ياشين كدره
هي غرامي ثم غرامي ثم غرامي كيف أعده=درةٍ(ن)ماظن بالي مثلها بالناس دره