يأهل موتر لوحته فوقها رمز الكويت=
صادرٍ(ن)من من عندنا عقب خلص عمرته=
ليا وصلتوا داركم وجبوهم بيت بيت=
وسلموا لي فوق منهو سبتني غرته=
قولوا الشاعر عرفناه واحد من ثبيت=
الرجل معروف والطيب ميزه لأسرته=
وإن نشدكم وش يبا قولوا أنته ما دريت=
الرجل محرور وعيونك اللي حرته=
وعلموه الأرض لو تنطوي لأجله طويت=
مثل ما يطوي خليجي براسه غترته=
وعلموه إن كان وده بشوفي له مشيت=
لين أكحل عيني بشوف زاهي حمرته=
وعلموه إني تصبرت لكن ما قويت=
دام وده فوق قلبي مركب جمرته=
وعلموه إني تسليت لكن ما سليت=
كل ما حاولت طيفه جنوني فرته=
وعلموه إني هويته وغيره ما هويت=
كيف بنكر حب روحي قبل قد قرته=
وعلموه إن كان صافي تراني له صفيت=
المشاعر والقصايد ترى ما غرته=
وعلموه إن كان ناسي تراني ما نسيت=
ما نسيت وصوف مضنون قلبي ونظرته=
وعلموه إن الهوى لن كتمته وإن حكيت=
خيره لولفي ولا تلحقه مضرته=
ثم ردوا لي خبر للكلام اللي عطيت=
وش يقول الصاحب اللي ظنوني برته=
نكمل المشوار والا يهدم ما بنيت=
وأدري إنه يفهم السالفه لن مرته=
لا يفوت العمر ما تفيدنا ياليت ليت=
العمر ما ينلحق لا تركنا زهرته=
الليالي مقفيه ما تعود لو بغيت=
والله أعلم وش لنا من مقدر صرته=
ياأهل موتر متجه عصر رايح للكويت=
علموا مضنون عيني يكرر عمرته=