تمنيتك تسامرني ليا قبل الفجر بشوي=تسولف لي عن اللي متعبك واللي معه مرتاح
تصارحني بكل اللي تحسه ما تخبي شي=ليا فضفضت عن كل ماهو مشغلك يا صاح
تلاقيني على ما تشتهي صاحب حبيب وخي=شريك لعمرك المقبل ولا تحزن على ما راح
تعال إشرب ينابيع الغرام أعذب من أعذب مي=وفا حب وهوى وأشواق فيها بلسمٍ(ن)لجراح
تعانيها وأعانيها حرقتنا مثل حرق الكي=تشب النار فينا لو تظاهرنا سِلام صحاح
تعال وشوف وشسويت فيني يا بعد من لي=ثلاث أرباع عمري راح والباقي أعده باح
غدا بي حبك وكني على جمر الغضا مشوي=أسامر طيفك الساري من المغرب ليا الأصباح
أطارد في حلوم الليل ترجع من جديد حوي=على باب الأمل ماني محصل بالحلوم أرباح
لكن هذا قدر مكتوب دامي بالحياه وحي=تبا تبقا لي المحبوب عشق يعانق الأرواح
عشقتك والعشق خارج عن اللي تملكه إيدي=مشاعر كل ما هزت خفوقي من غرامي صاح
تمنيتك تسامرني ليا قبل الفجر بشوي=تسولف لي عن اللي متعبك واللي معه مرتاح