يا ظريف الحسن والطرف الخجول=لا تراهن فوق طرف الإنكسار
لا تعرض حشمتك مجرى سيول=يجرفك السيل وتظلي دمار
إرفق بحالك قبل وقت الذهول=حاسب بدنياك وأحسن للقرار
إن عكست الدرب ما هذي حلول=وإن مسحته مسح يعميك الغبار
التأني فيه راحة للعقول=شاور ولا خاب منهو إستشار
قبل تقدم شوف قلبك والميول=لا تجازف بالمشاعر لإنتحار
خائف انك تنتظر تسعين حول=من سنة لا سنة صبر ومرار
وإن نويت القرب يالريم الجفول=لا تعذبني وتشعل في نار
لا تحداني وتقرع للطبول=بيت ودك اسكنه خله عمار
كان صادق بالمودة لا تقول=تدري العذال عن هذا الخيار
كان ودك ياهوى قلبي فضول=الحرائق تبتدي بقدح الشرار
حب ماهو صادقٍ(ن)يوم بيزول=لا يغرك لبس كانه مستعار
القلوب تذوب من حكي معسول=التلاعب شين بقلوب الحرار
المسافة بيننا عرضٍ(ن)وطول=شاسعة والوقت قابل للغيار
إن ركضت أتعبت نفسك والخيول=وإن قعدت أكيد بيفوت القطار
التفوق ما يحققه الكسول=والضغط لا زاد عقب لإنفجار
ذا كلامي كان عندك له قبول=خلك بدربي وحدد للمسار
الهوى له يا بعد عمري أصول=فيه زين وفيه شين وفيه عار
لا قريت كتابه وكل الفصول=حينها تقدر تخش الإختبار
إن نجحت اللي تبي سهلٍ(ن)تطول=وإن رسبت إقعد بصف الإنتظار
الهدف ما يحققه خبل مهبول=ذي حقيقة ثابتة طول العمار
يا ظريف الحسن والطرف الخجول=لا تراهن فوق طرف الإنكسار