الليل طال وجاير الهم ما زال=فكري سواة البن جوف المحاميس
القلب يرجف كن زلزله زلزال=والعقل حاير من جموح الهواجيس
كل ما سرا ولوال ناديت ولوال=بعد الرزانة صرت مثل المتاعيس
تنقلني الأوهام من حال لا حال=مرٍ(ن)هدى ومرار نزغات لبليس
لو زان حظي قلت:ذا الحظ ميال=وإن شان حظي قلت:كاسب نواميس
أحلم بحورٍ(ن)عين بالوان وأشكال=وأحلم بجنة ما تقاس بمقاييس
أحلم بملك الفرس والروم بالحال=وأحلم بعفريتٍ(ن)يقرب لبلقيس
أحلم بعقلٍ(ن)راجحٍ(ن)مابه هبال=وأبني على متن الثريا متاريس
ودي أطول سهيل لا كان ينطال=وأحط لي فوقه جيوش وجواسيس
بعت وشريت وقبل لليل ينزال=فيدي من الأحلام فيد المفاليس
سواة من يغرف من الماء بغربال=والا بمن يهدم جبال بدبابيس
ياليل قبل الفجر يطلع ويغتال=حلمي دخيلك لا يعود كوابيس
بسم الذي نزل تبارك والأنفال=وأرسى سفينة نوح فوق الطواعيس
قادر يحقق حلم عمري ولو طال=الفجر شعشع والأماني مراويس
الليل طال وجاير الهم ما زال=فكري سواة البن جوف المحاميس