الصاحب اللي بيننا كان ميعاد=وش وخره يا جاير الهم وينه
الليل طال ومنوة الروح ما راد=مدري وش اللي حال بيني وبينه
أحس من غيبته بالقلب وقاد=لكن مدري وين ذا الليل فينه
أنا أنتظر والعين ما طبها رقاد=وأخاف بعد النوم جافا لعينه
منهو خبر بالناس في حاضر وباد=اللي ينام ولهفته مع ظنينه
بلوذ بك ياصبر لو فيني سهاد=لكن هو ما حب شيء يهينه
أخاف تجرح خاطره نسمة براد=وأخاف من قذلته تجرح جبينه
وأخاف من علم منع سيد الأسياد=والا العواذل عنوةٍ(ن)مانعينه
يبونها تنكيل والناس حساد=أحدٍ(ن)حسدني والبعض حاسدينه
وإن كان هذا صار لو كاد من كاد=ما يعرفون إن المودة متينه
كل ما تمنوا بعدنا عشقنا زاد=أسرارنا بين الحنايا دفينه
صعبٍ(ن)عليهم بيننا دق الأوتاد=أنا وسيدي ودنا صاينينه
صعبٍ(ن)يفرقنا جماعات وأفراد=دام الغلا لقلوبنا مشترينه
نقهر زمان البعد لا عاد لا عاد=وقت(ن)يفرق بين خل وخدينه
تفشل خططهم والوعد بعد ينعاد=تنزل علينا بمر ربي سكينه
لو إختلف ميعاد بنحط ميعاد=عند اللقا ننسى ليالٍ(ن)حزينه