سلام الله وانا شاعر خصم ومجري الهياب= ومن لاياجد الهيبه يجي عندي ويلقاها
ليا منه وصل عندي وشاف النار والمشهاب= تنسم جنب صاليها وعدوانه تمناها

هلا يامرحبا يا شاعر من بعد طول غياب=ترانا في غنا عن هيبتك وحدك تلقاها
ترى منته بقد النمر لا من غرز المخلاب=جروحك يا عميل الخار صعب تلاقي دواها

لعل الك البقا وانا سندك ليا احتما الملهاب= وهذيه رساله جتك وافهم ويش فحواها
انا اقول الحبل يرتاع منه اللي لدغ بالداب= وصافح باليمين يمين ياالطيب ماتقواها

نبا نسدحك بالذرعان ونصرمدك بالمشعاب=يامجري والسباع الضارية صعب(ن)تحداها
تدرق يالحصيني بالغرف لا تعدي المرقاب=نجوم لامعة وسط السما ..تقدر تعداها؟

يدينك قاصره وضعيفه ماتطرح الشياب= علام البندق ام حدعش ثارت جوف مخباها
حصيني والذبيحه والمه ماهي صقر وغراب= بعد حظه جلبها ماتوخر ويتعشاها

بعد ربي رماك بدربنا ما عنكم مجناب=سباع(ن)رابضه في دربنا نبا نتوطاها
ياراع الطاسه المحلاب طاحت في يد الحلاب=تباها بالغطا والا تبانا نكشف غطاها

مادام الرابضه فيدتك فانته ماعلاك حساب= سباع الضلع انا خابرك ماتقدر تهمقاها
ترى من يفتري ياصاحبي بالزور والاكذاب= يدهور نفسه وربعه بقول الزور دهواها

نبا نشد الحمولة كلها في تندة القلاب=ومبروك الطماعة والعرب من مكسب يداها
نهايتها يدوم الستر الك يافاتل الأشناب=علوم(ن)من يضويها مع المسراح وداها