بسم رب الكون علام الغيوب=خالق الانسان غفار الذنوب
يسمع اللي يطلبه واللي يتوب=مبتدا قولي وفاخر مانجيب
بعدها سر ياقلم واكتب قصيد=فوق بيض اوراقها لولو نضيد
خل بعض الناس منها يستفيد=مع طلوع الشمس والا في المغيب
والسبب من جاهلا عقله صغير=حط نفسه في الجدال اللي مثير
معترض درب القوافل في المسير=يدعي قول النسب ماهو نسيب
ياعبيّد ماخبرتك فيلسوف=غير مثل اللي محنين الكفوف
منت كفوا للمهمة والصفوف=لاتقدمها تزيد العيب عيب
لاتعاند منت من قوم العناد=ماتقود الناس في الطرقة تقاد
ماتميز في البياض من السواد=في البلية شر ماتضحك عجيب
قولك البهتان والزور المشين=لو تشرفت الشرف لك مايبين
الشرف ماهو لكم يااهل (الحُصين )=ياعبيّد توب وارجع للحليب
روح دورلك حليب ومرضعه=لين يكمل عقلك اللي تتبعه
مالك ومال النسب له مرجعه=محتمينه عنك في غصبا وطيب
وانت تباع الاثاري يالفصيح=ماجنيت الا على مثلك قبيح
والرجال اللي يقولون الصحيح=ربعنا واللي غرب منهم غريب
قول للي معك في الدرب انحرف=مابقي الا غير يسمونا شرف
النهاية وقّفت عند الطرف=والذيابة ماتخاوي غير ذيب
وانت عنها أبعد من انجوم السما=تدني الواهم ليا الليل اظلما
مثل من يطرد سراب من الظما=في سموم القيظ شاويه اللهيب
ضاعت الطرقة على اللي منّجم=لو يطول الدرب عوّد للندم
من يسوي مثلكم غير العجم=يالله اني اطلبك في الدرب الصويب
جدك اللي تذكره في القاهرة=ماوصل لاهل النفوس الطاهرة
علمك المدسوس كلاَ خابره=لاتخفّي بعلومك في الشعيب
ضاعت الآمال في الدرب المخيف=والمضيّف سد بابه للمضيف
ياعديم المعرفة عوّد حليف=الشرف مالك على بابه نصيب
رحت مثل اللي يدور شي ماش=يضوي النجمة ويسرح من غباش
لااستراح من التعب ولااستعاش=طاب للخسران والا لايطيب
انت جاهل مامشيت مع الرجال=تحسب ان العلم في قيل وقال
والامانة ماتحملها الجبال=وانته اللي شلتها جهرا وغيب
ياقليل الفيد مانته قدّنا=مانت واصل لمواصل جدنا
وعدك الخواف خالف وعدنا=في نهارا نكسب الطالة غصيب
تدعي بالكذب شي تجهله=لو تقول الصدق مانته واصله
النقط فوق الحروف المهملة=والردي مثلك يجيب اللي يجيب
مااحنا في حاجة رديين الحضوض=فعلنا مرفوع عن زي العروض
قصة الراوي وقع فيها غموض=والحقيقة واضحة للي يصيب
كل عما تذكره تقصر يديك=تنتقص قوم الفعل والنقص فيك
فعلهم ماياصله جدك وابيك=كيف مثلك يدعي الامر الصعيب
انت وش سويت لك يافرخ بوم=انشد التاريخ يعطيك العلوم
فيه تلقى الكبكبي راعي االزوم=مقسمه وافي حضر والا يغيب
كبكبي والكبكبي عزوة هذيل=وارث الطالات جيلا بعد جيل
وانت للي تتبعه عودت ذيل=ماوصلت اهل الشرف حضك يخيب
احمد النعمة في حكم آل السعود=والعن الشيطان ياراعي الشدود
لاتناظر من وقف واللي قعود=ترهق الاعصاب وتزيد المشيب
والسموحة يالرياجيل الفلاح=الغلط جا من براقش في النباح
ليتها في ماجنت جابت رباح=لاهلها لكن جابت كل عيب
نعتذر والعذر قدامه سبب=للرجال اللي يجيبون الطلب
غلطة الجاهل عليهم تنحسب=في النتيجة رقمها يطلع عجيب