غريبة كلام اليوم ماهو كما البارح=ولاني بداري ويش غير كلام الليل
بعد كان حلو اليوم طعمه غدا مالح=من الصاحب اللي يتقن الفن والتمثيل
ولا ياطويل العمر لن كنت بتمازح=تراني حسبته جد وأقول الك تكميل
لكن الليال طوال والضاوي السارح=وصبرك علي شوي وأوفي لكم بالكيل
ترى من يعرض يده للمخلب الجارح=على غير بصر تروح ياويلها ياويل
سهرت الليالي كلها والفكر سارح=أعلل هجوسي بس ما فادها تعليل
زماني مهول لو أنا شاطر وناصح=تضيع البصائر فيه يا عدل وين الميل
كثيرة قضايا مالها منهج وشارح=ولاني محصل فوقها حجه بلا تدليل
ومن ضمن ما عانيت وش يجذب السايح=لصحرا بعيده مابها ظل جنبه غيل
غريبة عجيبة ويش فيها من الصالح=رمال ليا هب الهوا مثل بحر مهيل
شقا والشقا مكتوب دائم على الكادح=حياته على الله كلها بين حط وشيل
كذا صرت أنا والفكر في ليلي البارح=أبني قصور بماش وأهدها وأزيل
مضى ليلي البارح على مبهم(ن)واضح=لكني نويت أعرض كلامي على بن زويل
لعله يعرف السر بالمبهم السانح=ويشرح لنا ما صار في ليلي بتفصيل
تخاريف شاعر والشعر قادم ورايح=على صهوة الأحلام تركض سواة الخيل
تقولون كيف وكيف يالغامض الواضح=كلام كتبته صبح والقول كان بليل

بن هليل

صــــح لسانك وعلا شانك

قصيده جزله من شاعر جزل

ابـــداع متميز ورااااائع

تقبل تحـــــــــــياتي