ياالله يارزاق عكف المناقير = كل(ن) يجيله ماقسم له حصيله
والداب الاعمى فالخلا جايه الطير = وهو محله لابد(ن) فالدبيله
نطلبك تهدينا على نية الخير = والجنه اطيب والغصون الظليله
سلام يادار الرجال المناعير = اهل الكرم واهل السيوف الصقيله
دار(ن) يباشرك المطر صبح وعصير = من مزنة براقها فالمخيله
مزون غر من الوسوم المبادير = مافيه شعب الا تدارج مسيله
والنبت عج وفاح ريح النواوير = واخضر غصن النبت من غب سيله
جينا على دعوة رجال(ن) مسافير = من دارنا لو المسافه طويله
جينا نسج اقدامنا دون تأخير = مامن عذر نبديه لاهل الفضيله
ناصين دار اهل الدلال المباهير = اللي علاها الهيل والزنجبيله
ذباحة الحايل نهار المعاسير = الجود فيهم من ليالي طويله
والله يبارك في جهود المشاهير = اللي رقت بالعز راس الطويله
بجهودهم مثل السيوف البواتير = اللي نهار الفعل فيها صليله
شادوا مخيمهم امام النواظير = حطوه للاجناب وابن القبيله
ماكنه الاحلية طويق والنير = كل(ن) يشوفه من بعيد ويخيله
بمخطط(ن) دايم نبوته مزاهير = فارض المصيف المشتهر واحليله
وسموه باسم(ن) يجذب اللي مسايير = واللي سمع باسمه لزوم يعني له
احلى مصيف الرمز مافيه تقصير = لاغلى ضيوف(ن) بالمعزه تجيله
قاموا يديرونه رجال شواطير = من اجل تحقيق الهداف النبيله
والغيث من قطره يجيب التباشير = والوبل يقفاها بيوم(ن) وليله
اول هدفهم دين معنى وتفسير = يوضحون الدين بابسط وسيله
للجاليات اللي على وضعهم غير = اللي مساعيهم تجاههه قليله
سووا لهم دعوة اخوه وتقدير = واستقطبوا من كل قطر(ن) فصيله
وجوههم كما جول الضوامي على البير = عطشى وكل(ن) يمهم شد حيله
واسلم بفضل الله خمسين وكثير = والخير مقبل دام فيهم جميله
والتايب اللي يمهم واصل السير = والشخص معروف(ن) بدينه خليله
ودورات علميه اجابه وتحرير = وكل بمجهوده يزيد الحصيله
ومعارض حطت لشرح وتعبير = للتوعيه والشخص عقله دليله
وصلاه ربي عد نبت المخاضير = على نبي كلنا ننتمي له[/

صح لسانك وسلمت يمينك


قصيدة متميزه


وجزله من شاعر جزل



تقبل تحيتي