يا اللـه يا المعبود ياخـير الأسـامي والصفـات = ياخالق المخلوق يامحصي عدد ما بالوجود
ياجابر العثرات حلال الأمور الكا يـــدات = مالي رجاء إلا في رجاء رحمتك يالرب الودود
أنت الـمجيب لمن دعاء يامغيث خلقك والنبات = عبدك رجاء عفوك وحسن إرضاك والعالم رقود
آمنت فيك وفي قضاؤك والقدر شـر ونجـات = وكتابك المنزل وكل الرسل واللي لك جــنود
من الملائكـة العــــظـام ويوم تجـمعنا عـرات = يارب ترحم حال عبدك لاملاذ ولا صـــــــمــــود
يارب عـفـوّك يـوم لا ينفـع بنين ولا بــــنــــــات = والعبد ماســـــــــــواه في دنياه باللوح معدود
أنت العليم بخـافي المكنون وأسرار الحيـات = من بعد ذكرك ياإلــــــــــــه الكون ياخير معبود
قال الـتبـيـنـاوي تهيّض في جزيل المـفردات = أشفق على العسرات لوكانت على غيري تكود
الشعر هاض بـمفـرداتـه كاالجواهر صافيات = مثل الذهب أو مثل عقد اللماس في صدرالعنود
بنت الحصان من الأصايل والمهـارالمسرجات = والخيل قيل الخير كله في نواصيها مـــــعـقــود
أنا بقـدراة الولي كنّي على نهـر الـــفـرات = أنا اللذي سويت لبحور النبط صدر وعــــــمــــود
يشهد على مـاقلت شـعـار الجزيره والرواة = هذي من الله موهبه أرسي لياهــــاب الشرود
أحفظ مـلازيم الرجال وقدرهم والواجبات = والحمد لله طول عمري ماتــــــجــــاوزت الحدود
حنا بضل أولاد مقرن حكمهم شـرع القضات = الله يحفظ خادم البيتين وأولاد آل ســـــــعــــود
في ضلهم شـعب الجزيره مهتنين باالمـبـات = مايجهل التاريخ يحكي فعل وآفين العــهـــــــود
وتستاهل التكريم يااللي حشت كل الطايلات = يابن الجــــميعــــــه ياسديد الراي حلال العقود
فيك إجتمع يابن الجميعه طيب خلق وحسن ذات = والمدح بالطيّب مثل شــــرواك في مدحه يزود
سـلام ياعلي الجميعـــــــــه لك فعول ٍ وآفـيـات = المال وأطراف الجسد والناس لأفعال شــــهود
إفزع لشعار الجبل والشعر من قبل الـفـوات = عـــــــزز رجال المعرفه والشعر من بعد الخمود
والطيب وعلوم المراجل مـاتجي باالـهـيـنات = تحتاج فعل وقــــو عــزم وصبر ودروبه ســـنــود
الله يعجل باالفرج والوضـع يبقى ذكـريـات = من فزعتك فـــزعـــــات غيرك لو فزع فيها برود
يازبن من ظـامـه شـديد الوقت من كل الجهات = ياطاح حـــــظــه وإنعثر حيله وجازوه الــصــدود
يرقـاء بـعيـطـاء من طويلات الجبال النايفات = يالله عسى يفداك عفن الناس والوجـــه اللدود
الشـعـر مـايفنى وعلم الطيب مـايفنى ثبات = كم خيّرن نحكي عن أفــعـاله وهو تحت اللحود
الله سـبحـانه يقول الباقيـات الصـالــــــحـات = العفو يامن لك عبادك خــــــــاشعينن بالسجود
في ملتقى السيف الثقافي للعلوم العـاليـات = من كان يطمح للعـــــــــلاء شرواك للعلياء يرود
والشعريسموفي سمو أسماءالأسامي والسمات = حائل مقام أهل القيّم اللي له الفعل محمود
يا الله تعوض اللي قضـا عمره كفاح وتضحيات = يارب لاتجعل بنا ظالم ولا فينا حــــــــقـــــــــود
ومن قبل لايبعـدبي التفكـير أبشكر نـايـلات = تلك القـــــنــــــاة اللي تبث أخبارحائل والنفود
ولاأنسى فضل رجف القوافي له جهود ٍ وآضحات = وأشكر جميع المجهدين اللي بجهدتهم نجود
سـلام من دار الكرم حائل ولا عنها غـنـات = بأجمل شــذاء فوح أفخر العنبر ونفحات الورود
هي أمـنـا دار الكرم ياكبر قـدر الأمـهـات = هي أمنا هي أمنا حائل ووالدنا ســـــــعــــود
مـاقّل دّل وقلت كلمة حق دون إمـجـاملات = رد الثنى يابو فهد واجب وأنا ماني جــــــحــود
المعـذره يابو فهد مـاقلت كل الـمـعطـيات = وأجمل تحياتي لكل الحاضرين بلا قــــــيـــــود
الله يديم الستر لأهل الستر عن هرج الشمات = يارب تجعلنا نقول الحق مافينا شــــــــــــــرود
يارب تجمع كل شمل المسـلمين بلا شـتـات = يالله تـــعــــــز بعــــــزتك من فيه عز وفيه فود
دنياك مـادامت لحي وكل نفس ٍ له وفـات = عسى نعود العيد وإلا العيد عـــــــــاداته يعود
وختامهاصلوا على صفوّة قريش أزكى صلاة = المصطفى الهادي شفيع الخلق في دارالخلود