صوتك علاج القلب والصدر والروح=يا ضاق صدري والفضا كلّميني
الضحكة اللي كلها ود ومزوح=فدوه لها عمري وباقي سنيني
المشكله وجهك معي وين ما اروح=من وين ما وجّهت قدام عيني
غريق حب وما سكٍ له طرف لوح=أصيح لك بالصوت لا تتركيني
ردّي تراني واهن الحيل مجروح=قبل النهايه حاولي وإلحقيني
إما اتركيني وسط الأمواج مطروح=وإلا على شط النجاة اسحبيني
وإلا ترى ذنبك من القلب مسموح=للموت للبحر الغريق ادفعيني
تعبت من جرحٍ من العام مفتوح=تعبت أقول من التعب عالجيني
ملّيت من بعدك من السهر والنوح=خلاص من هذا العذاب ارحميني
حبك علاج جروح وأسباب لجروح=ما هو على كيفي ولا في يديني
والله ما عودت قلبي على البوح=حبك كتمته بين قلبي وبيني
ترى الغلا يا صار للناس مفضوح=تفرح به العذال والحاسديني
يا اغلا بنات آدم ومن رافقوا نوح=يا وجد حالي من غلاك وحنيني
ان كان لك في جرح مغليك مصلوح=في كل ساعه با الرموش اجرحيني
لا تاخذك رحمه ليا صرت مذبوح=بسود العيون الناعسات اطعنيني
يا وردةٍ تاخذ من العطر وتفوح=بريح النفل والطيب والياسميني
الشوق والكتمان للروح ذابوح=أخشى يجي يومٍ يبيّح كنيني
أشتاق لك دايم وأنا فيك مشفوح=شوق الفيافي للمطر صدّقيني
ما طالعت عيني ورى كل مملوح=لا اللي يبي بعدي ولا اللي يبيني
جيّرت لك حبّي من الروح للرّوح=وهذي على عهد المحبة يميني