القوافل العربية - إعلانااااااااااااااااااااات؟؟؟!!!

:pجميل إنك تتابع برامج التليفزيون المفيده ، لكن المصيبه عندما تقع فريسة إعلانات التليفزيون و التي يدسونها لك في الفواصل و القواطع و العوارض و ما شابه ذلك ..

المذيعه في إبتسامه عريضه شريره : نلتقي بعد فاصل قصير .. نياهاهاهاهاهاها

ستار يُسدل على الشاشه يذكرك باسم القناه لتكون نسيتها و لا حاجه..

بنت كدا تظهرلك زي العفريت و مخبيه و را ظهرها حاجه تذكرك بريه و هيَّ مخبيه القماشه المبلوله ورا ظهرها ، ... و تطلعلك علبة شاي مرسومه عليها حشره ...

شاي الفسفوسه زيه ما تلاقيش
و لو رحت المحل و لقيت غيره ما تشتريش
واحده جربته و عجبها
و من كتر ما حبته حطته في النيش
قدامك خيارين
يا إما تشتري يا إما ما تشتريش
و لازم تشرب العلبه في يوم واحد
يا إما هيطلعلك في وشك فسافيس
و المفآآآآآجأه..
عرض خاص .. مع كل علبة شاي الفسفوسه ، هتآخد برغوت هديه ....... مجااااااااناً...

###########
الإعلان الثاني ..

يظهرلك كدا ع الشاشه راجل شكله صالح وورع و كأنه هيعيط من كتر التقى ، و يقولك بصوت منخفض ، إتصل على 0500000000000000000 علشان تكسب رحلات حج أو عمره ، لو جاوبت على السؤال دا ...

من هو آخر الأنبياء ؟ عليهم السلام ..

1 سيدنا آدم
2 سيدنا عيسى
3 سيدنا صالح
4 سيدنا محمد ـ عليهم الصلاة و السلام .

و أنصحك نصيحه أخويه ، لا تجاوب على السؤال قبل أن تقرأ في المراجع كلها ..B)

يبقا الرقم كام بقا ؟
0500000000000000000000000000
علشان تكسب رحلات حج أو عمره شامله الإقامه و الإنتقالات و التأشيره و تذاكر السفر و السندوتشات ...

يبقا الرقم كااااااام ؟؟؟ شكلكوا نسيتوا ...

0500000000000000000000000000000

و السلام عليكم و رحمة الله و بركاته....

الإعلان خلص الحمد لله ... الشاشه فجأه إسودت و طلع الراجل تاااااني ...

ألا هوا الرقم كااام؟؟؟؟

##############
الإعلان الثالث : ...

الشاشه فجأه و بدون مقدمات تجيلها هيستريا ، و تسمع صوت تليفون بيرن ، تجري طبعاً ترد على تليفونكم .. لكن ، تكتشف إن التليفون بيضرب في التليفزيون ، و تلاقي واحده ممصوصه و شكلها ناقعه وشها في علبة ماكياج بقالها شهرين ، و لابسه بنطلون مقطع المهم إنها لابسه حجاب ، بترد على التليفون دا ، و يقطع هذا الملل صوت رجل يقول بانشكاح ..:

الآن ، و بعد أن وصلتنا التكنولوجيا من تشكوسلوفاكيا رأساً على عندنا ، نقدم لكم التليفون أبو زراير ، هذا التليفون يتمتع بخصائص فريده من نوعها ، أولاً : يحتوي على زراير بها أرقام من صفر إلى تسعه ، هذا بالإضافه إلى وجود سماعه تحتوى على سماعتين ، واحده تسمع بها المتحدث و الأخرى تتكلم فيها لكي يسمعك المتحدث ، و من خلال التليفون أبو زراير تستطيع أن تطلب أي رقم في أي وقت ، و المفآجأه ، التليفون يتمتع بخاصيه تكنولوجيه جداً ، بيرن ليعطيك إشاره أن أحد يتصل بك ، لا تفوت الفرصه و لا تدع العرض يفوتك

سعر العده الواحده 257 جنيه ،
و إذا إشتريت عدتين تحصل على خصم 3 جنيه
أي يصبح السعر 511 جنيه بدلاً من 514 ...
إتصل ب 55778899
لتحصل على العرض المميز بتكاليف شحن 70 جنيه فقط
إتصل فووووووووووررررراً يا أهبل ..
###################

الإعلان الرابع :....

صورة واحده عجوزه و أطفال بؤساء حواليها ، و في عينيهم جميعاً ملامح البؤس و الشقاء ، و يقطع هذا المشهد المأسوي صوت رجل مأسوي أيضاً ::..

شايف اليتامى دول ؟ تقدر تدخل عليهم البهجه و السرور ، تقدر ترسم البسمه على شفايفهم ، و تساعد الأم في توفير دخل يساعد على مكافحة ظروف الحياه الصعبه ، كل دا تقدر تعمله بجاموسه ، أيوا يا سيدي جاموسه إيه ؟؟ في إيه ؟؟ مالك بتبحلقلي كدا ليه ؟؟ و يجيبلك صورة جاموسه علشان تصدق ودانك ، و على رأي المثل إللى أنا مألفاه لسه حالاً ، " إن كذبت الودان ما تكذبش العين " ....

و يستكمل ، و بكدا تقدر تدخل البهجه و الفرح عليهم و تساعد أم في تربية عيالها . ..

إتصل الآن على ..
07000
علشان تشتري جاموسه .B)
و المفآجأه ..
عندما تشتري جاموستين سوف تحصل على جاموسه تالته هديه
و عندما تشتري جاموسه واحده ستحصل على 5 كيلو برسيم مجاناً
إتصل لتصلك الجاموسه لحد البيت ...
و ينتهى الفاصل ....
مع لقاء آخر في فاصل آخر ...
و كل سنه و إنتوا فاصلين...