لوالغرام الّلي يحسه فؤادي=تعرف مذاقه ما تهنيت بالنوم
أنتِ هوى نفسي وغاية مرادي=والود ما بين الضلاعين مكتوم
طعم الهوى للنفس حر وبرادي=مر(ن)يروق الجو ومرار محموم
قيدتني واوثقت ربطة قيادي=وأسقيتني كاس(ن)من الرمش مسموم
أرجوك ترحمني وخل العنادي=واعلن لنا عفو(ن)متوج بمرسوم
أنا بشر ماني بقطعة جمادي=لكن من عطف المحبين محروم
وأبايعك وأبوس فوق الايادي=أنت حكمت ومثلي اليوم محكوم
تشرق لنا الايام بعد السوادي=وننسى زمان(ن)فيه حسرات وهموم
حبك خفي والهم بالوجه بادي=عذبتني وانا من الحب مظلوم
لأجل العيون ولأجل زم النهادي=برخص عزيز النفس وأطيح وأقوم
لو كان يحداني من الوقت حادي=لأبذل عزيز المال والرزق مقسوم
يرخص لك الغالي ولو كان زادي=ما عندي أغلى منك يا سيد القوم
حبي الك ماهو من الحب عادي=أحسك بروحي خيالات وحلوم
يا وردة أيامي وفلي وكادي=أنا بدونك هيكل(ن)داخل هدوم
إرحم عسى يرحمك رب العبادي=جود بوصل ما قلت لك شيء معدوم