يا حلمي اللي تمنيته سنين ٍ(ن)طوال=أساهر الليل من شأنه لوقت الصباح
كامل مكمل من اللي متصف بالكمال=يا منبع الذوق كله والهنا وانشراح
اليوم وش بك تهددني بقطع الوصال=لا والله إلا ذبحت القلب بُعدك سلاح
يا قدرة الله وش هذا العلوم الثقال=بارق فراقك لعيني ياهوى البال لاح
وشلون بقوى على بُعدك وصبري محال=والله مقدر على صدك يا سيد الملاح
أكبر مصيبة على المشتاق في كل حال=فراق من هو يحبه جد وإلا مزاح
وشلون عاد الفراق اللي يذل الرجال=لا قالها من يوده شامخ القوم طاح
هذا وربي مصيبة فوق كل الخيال=ما بعدها من مصيبة يا نزيف الجراح
تطعن عروق الفؤاد اواه كيف احتمال=ذيك العروق الصخيفه من عذاب ٍ(ن)مباح
أثر الهوى في وداعه ما يعرف اعتدال=لا من نوى للمفارق كب جرحه وراح
وأثر المفارق على العشاق مثل الجبال=يكتم صدور ٍ(ن)وساع ولا يواطن فراح
وش عاد باقي بعدكم يا بديع الجمال=ما باقي إلا مواجيعي وكتم النواح
ما ودي العين تدمع من جواب وسؤال=لو المشاعر تنوح وصافي الدم فاح
لكن على ربي الشكوى رفيع الجلال=ينزل علي السكينة واهتني بارتياح
باقي حياتي بعدكم مايلة للزوال=دنياي من غيركم ما عاد فيها صلاح
ياحلمي اللي تمنيته سنين ٍ(ن)طوال=أساهر الليل من شأنه لوقت الصباح