دندن القاف في صدري بليا عدد=والمشاعر تزاحمني طوابيرها
من نهار الأحد حتى نهار الأحد=المشاعر بقلبي زاد تكديرها
أتقلب وعيني كن فيها رمد=غبر الأيام هبتني معاصيرها
كل ما امطر سحاب ولاح برق ورعد=ذكرتني بمزيونة وتصويرها
يوم كانت بكفيها تلم البرد=والسحابة تبل الترف من خيرها
من بعدها فؤادي ما تهنى بأحد=ما شغلني بعدها بالهوى غيرها
يالله إنك ترجع لي ليال السعد=رد لي وردةٍ(ن)فقدت تعطيرها
البلد من بعدها ما نحسه بلد=دورة الوقت لفتنا على سيرها
حلو الأيام راحت ما بقي لي جهد=عذب الأحلام جفف حظنا بيرها
ونة الصدر تلهد في خفوقي لهد=والهواجس بفكر حار تدبيرها
إستباح القهر قلبي ولا له مرد=مر الأوهام عنتني مشاويرها
هب يا وقت تاليته علينا نكد=غبر الأيام ما تومن محاذيرها
وقف القاف في صدري بليا مدد=والمشاعر تخلت عن طوابيرها