قالت تعال وعزة اللي خلقنا=إني ماطيق البعد لو ربع ساعه
تعال شوف لحالنا من عشقنا=القلب يرجف والمشاعر مطاعه
تعال يا عمري ترانا احترقنا=ما عاد باقي بالمشاعر مناعه
من دون ما ندري ترانا انسرقنا=العمري يجري والليالي مراعه
البال ما يرتاح لو افترقنا=البعد فعله مثل فعل المجـاعه
الصد والهجران يحرق ورقنا=والشوق ناره فوق للإستطاعه
يجرح مشاعرنا وينشف عرقنا=الشوق ما يقنع بكنز القناعه
لا من برق بالفكر حنا برقنا=ما عاد فينا للتصبر شفاعه
وليا بغينا نقنعه ما قنعنا=نرجع نحن وشفنا بالقناعه
اللي ركضنا خلفها ما لحقنا=أحلامنا طارت مطير الإشاعه
يا سيد أحلام الليالي شرقنا=وأرواحنا فينا تراها وداعه
تعال داو لجرح بالروح ذقنا=تعال وصل حبل فيه إنقطاعه
حبل الغرام اللي مجود وثقنا=لا تقطعه ترى المواصل طماعه
قلت أبشري قسم بربٍ(ن)خلقنا=إني ماطيق البعد لو ربع ساعه