تعالي نوري ليلي انا مقوى ظلام الليل=تعالي يا بعد عمري أنا فيني بدونك خـوف
تعالي زيحي أوهام السهر ما عاد فيني حيل=تعب قلبي من الغربة وعيني صابها صادوف
لذيذ النوم ما جاني لوحدي جنب نهر النيل=أراقب للمراكب ماش لا عارف ولا معروف
أغني للقصائد ماش منهو للقصيد يشيل=وأرد أقطع لحون الشعر وأطلق ونةٍ(ن)بالجوف
ليا مني ذكرت إنك بعيد وحال دونك ويل=يا ويلي من مسافات البعاد وقاسيات ظروف
تبدل حالي اللي كان من ماضي ليا تأجيل=حسافة يازمن ما كنت أظني بشتكي لحسوف
أنا بالقاهرة أون والمضنون بٌعد سهيل=ولاني عارف بحاله بهذا الليل صفق كفوف
ألا ياليتني أعرف ظروفه كل بالتفصيل=لكن الله كتب مدري عن أخباره بعلم وشوف
أسامر للنجوم الساهرة وأرسل مية مرسيل=لعل يرد لي جواب ما جاني يكود طيوف
طيوفه وافية ما تنقطع بالحل والترحيل=تسامرني وأسامرها لو إن الهجر قام يحوف
لكني عاذر الغالي ولاني في غلاه بخيل=أنا داري بعذر حبيَبي ما قلت حيف وحوف
حبيبي كان ما بعذره ماني بالكرام أصيل=ومن لا يعذر الغالين ماهو من هل المعروف
أنا من زود حبه ما نسيته في عدول وميل=مناي أكون أنا وإياه بالدنيا سوا ونطوف
نطوف الكون كله ما يفرقنا بعاد مهيل=ونحضن عشقنا بكفوفنا مافيه وجه كسوف
لكن الله بلانا بالبعاد وحيل يا حلحيل=بعد ما صرت من طول المسافة كني المكتوف
نهايتها حبيبي ما نطولها بحط وشيل=غرامك في سويدا القلب من يوم اللقا ملفوف
أحبك وأعشقك وأهواك صادق معرف التمثيل=عسى قلبٍ(ن)تولع بك عذابه بالعمر مخلوف
أنادي لك بعال الصوت انا مقوى ظلام الليل=تعال الحق على حالي أنا فيني بدونك خوف