وين الحبيب اللي من العام غايب=طول غيابه والمشاعر تناديه
تعال يابعد الأهل والقرايب=يامن عيوني ساهرة في حراويه
أسهر على شانه وفيني شبايب=من واهج الأشواق في قلب مغليه
وأنشد عن أحواله ذوار الهبايب=اللي تجيني عابرة من نواحيه
تحمل شذا عطره وكل الرغايب=اللي تمناها فؤادي ويرجيـه
من واحدٍ(ن)صب المحبة صبايب=داخل عروق القلب ثم استكن فيه
والليلة أنا من محبته ذايب=في كل دقة قلب نفسي تلاقيه
حبيب روحي قبل كل الحبايب=في كل شيء أشوف طيفه واحاكيه
ماله بقلبي عقب غيبته نايب=ولا فيه شيء القلب عقبه يسليه
مافيه غير الشعر والشعر شايب=شاب القصيد اللي من أول يغنيه
بعد غياب اللي من العام غايب=نبض المشاعر بالحشا من يناديه