يا مشعل الشوق لا تنشد عن أحوالي=ما تنطفي نار شوقي وأنت مشعلها
لي مدةٍ(ن)يا غلا ما يعجبك حالي=تالي لياليً ما تعجب كما أولها
زهو العمر راح ولى والله الوالي=دنيا تغربل عسى ربي يغربلـها
من عقبكم ما بقا لي بالزمن حالي=ما باقي إلا مرار هموم نحملها
طول غيابك وصبري ياهوى طالي=الروح سقم العنا والبعد واصلها
ذبلت شفاه القصيد وعذبها زالي=مشاعر الحب جمر الشوق بهذلها
أحمل جروح الهوى مقفا ومقبالي=عوجٍ(ن)على الفكر ما يقدر يعدلها
يا كثرها بالخفوق عراض وطوالي=يعجز لساني وشعري لا يفصلها
لكن ليا جاك مني نص مرسالي=جميلتك يا حياتي تو كملها
إحنذ لقلبي على جمر الجفا الصالي=وإلا ترفق وهات دواك وإزهلها
كل المواجع تطيب وينشرح بالي=لكن متى جيتك صوبي تعجلها
أرتاح وتريح أشعاري وموالي=يا ناقض حبال حلمي عود وإفتلها
لا تزيد يا منيتي همي وغربالي=صب المشاعر بكاس الشوق وإرسلها
بصبها بالخفوق بشارة الغالي=والغيبة اللي تضيمه لا تطولها
توك على منزلك لا تتركه خالي=ساحات قصرك بقلبي زين جملها
أنته مكانك بقلبي يا غلا عالي=في منزلة عالية ما شخص ياصلها
يا مشعل الشوق لا تنشد عن أحوالي=ما تنطفي نار شوقي وأنت مشعلها