الليلة الطاروق عجلٍ(ن)سبوقي=حرك شجون القلب والقلب مذبوح
مذبوح من فرقا وليف معشوقي=له مدةٍ(ن)ما زارني ليل وصبوح
طال الغياب وجرًح الدمع موقي=ما جيتني يا مشغل القلب والروح
ما جيت تطفي جيتك بعض شوقي=الدم بعروقي من الشوق بيفوح
مشتاق لك شوق المساء للشروقي=شوق العطاشي قطر من بارق يلوح
عيني لشوفك كل ليلة تتوقي=وأحلام ليلي كلها تطلع مزوح
هواك ناسج من حوالًي طوقي=فارض عليً حصار ماعاد بيروح
حكمتني وأحرمتني من حقوقي=سجنتني بالسر وأحرمتني بوح
منعتني أشكيك فوق الطروق=ما حيلتي إلا التلاميح بالنوح
أدرى وأداري لا تبين حروقي=لكن موكد من شكى عشق مفضوح
ينزف قصيدي والملامات فوقي=يا مهلكي بالحب مسموح مسموح
يفداك قلب ودم داخل عروقي=ويفداك كلي يا بعد كل مملوح
بينك وبين البيض عندي فروقي=يا جامعة في ذاتها كل ممدوح
ما عاد همي كيف بهنا وأروقي==همي تكون بخير مرواح وسروح
قلبي عليك من الليالي شفوقي=ما ودي إنك تشتكي هم وجروح
حظي معك معيوق مدري يعوقي=وأكبر مصيبة حظ لن صار مسدوح
ما فات ما يمدي عليه اللحوقي=ماهو حصل لابد مكتوب باللوح
الليلة الطاروق عجلٍ(ن)سبوقي=حرك شجون القلب والقلب مذبوح