يا صاحبي لا عاد تنشد عن الحال=أربع سنين الفكـر ماهو برايـق
بين الرجاء والياس يا طيب الفال=مرٍ(ن)يورى لي ومر متضايق
أضحك وأنا فيني من الهم غربال=حيث الزعل للوجه ماهو بلايق
أخاف يفرح بالمخاليق عذال=أهل الشماته واجدٍ(ن)بالخلايق
ناسٍ(ن)تشيل الحكي مقفا ومقبال=كم فرقوا بأقوالهم من فرايق
هذا سبب شكواي يا مشغل البال=إن كان ودك معرفة بالحقايق
في داخلي من ماض الأيام زلزال=حطم جبال الصبر والصدر ضايق
لا من ذكرت لغيبتك وقتها طال=مر الصبر ما عدت أنا فيه طايق
أبيك عندي فدوتك غالي المال=وإن كان ما كفى فدتك العلايق
لولاك غالي ما تهيضت بأمثال=ولا كان شاق القلب بالبعد شايق
لكن حلاك أحلى من عسيل عسال=الذ وأشهى من عسل نحل ذايق
مير البلا يا صاحبي حظنا حال=ما بيننا والوقت زاد العوايق
أيام وأعوامٍ(ن)بحلٍ(ن)وترحال=ياما سلكنا للتواصل طرايق
نرجي حلومٍ(ن)كنها مي غربال=تساقطت مثل الفراش بحرايق
هذا جوابي يوم ياصاحب تسال=نعم الوفي والحظ بالوقت بايق
يا صاحبي لن كنت تنشد عن الحال=أربع سنين الفكر ماهو برايق