أنا الليلة بعقلي هواجيس دفاقه=عليها يهب من الحشا عاصفٍ(ن)ناري
تذكرت حيٍ(ن)دونه الرجل منعاقه=ليا من ذكرته شبت النار بأفكاري
غرامه سكن بالروح تعشق له عشاقه=وخلي عن اللي صابني يعلم وداري
تحن المشاعر حن مفرود عن ناقه=ليا أظلم عليّ الليل طيفه يجي ساري
وأنا أدري بشوقٍ(ن)شاقني للهوى شاقه=على علم بأسراره وهو يعلم أسراري
جميع العنا اللي ذقت خلي بعد ذاقه=نسامر حلوم الليل للصبح سماري
حلومٍ(ن)بعضها للهواجيس صعَّاقه=تخيب لظن الحب لا جا لها طاري
ومنها حلومٍ(ن)حيل عذبة ورقراقه=تغازل مشاعرنا وتقبل للأعذاري
ومنها حلومٍ(ن)لأعذب إحساس محَّاقه=تزيد الجروح جروح وتجدد الباري
يالليل السهر ما عاد لي بالسهر طاقه=تعب قلبي الموجوع ما عدت صباري
هموم الزمن والحب للحال سراقه=وأنا طال يالليل السهر معك مشواري
حلقت لحلوم العمر يا وقتي حلاقه=تركت المواجع بالحشا مالها شاري
وغصن الهنا ياوقت حتيت لأوراقه=وش اللي بقي عندك من أوجاع وأخباري
تصبرت لكن المواجيع حراقه=طعون الهوى في داخلي سهمها غاري
لعب بي زماني لعب يا طاق طرباقه=وذا الحين أشوفه عازمٍ(ن)يطفي أنواري
أنا الليلة بعقلي هواجيس دفاقه=عليها يهب من الحشا عاصفٍ(ن)ناري