الليلة الطاروق موجوع ما طاب=مدري عيا وإلا عن الغي تبنا
لو تبت أنا طاروق الأشعار ما تاب=عذب القصائد للمشاعر طلبنا
بكتب قصيدى فيك يا بعد الأقراب=لولاك غالي عندنا ما كتبنا
ما دام أنا واياك يا حبي أحباب=تتعب ليالي عمرنا ما تعبنا
ما عاد بقوى ضبط نفسي والأعصاب=من كثر ما نسهر من الشوق شبنا
غديت أنا ومسامرك ليلي أصحاب=من غربة أحلام الزمان إغتربنا
نتبع لحلمٍ(ن)لو صدق قلت كذاب=نبي لراحتنا وحنا نشبنا
وأنا أشهد إن الحب للقلب غلاب=يجبر مشاعرنا ولو ما رغبنا
تحتار في كشفه تحاليل وأطباب=لو له علاجٍ(ن)كان بالعون طبنا
وليا عرفنا أسباب نجهل لنا أسباب=ياما عليها بالليالي لعبنا
شبنا لكن الحب لا زال ما شاب=يلعب بنبض قلوبنا ويغصبنا
نتبع هوى التلعات للروح غصاب=لو سابنا يمدي مع الوقت سبنا
حب العذارى للمناعير جذاب=يشعل لناره جوفنا ويحطبنا
تركع على شانه معاكيف الأشناب=نغلب لكنه بالزمان يغلبنا
ما يأخذ إلا بالنواصي والألباب=ياما ليالي من قداحه شربنا
كل ما قفلنا باب ينفك له باب=هذي خسرناها وهذي كسبنا
نتبع خسايرنا على شأن الإعجاب=وإلا ليا منا بجوه طربنا
ننسى فضائلنا وننسى للأنساب=لا من كوتنا نار الأشواق ذبنا
لا لفنا من حولنا ريح الأطياب=لو المنايا تنتخينا ركبنا
ما عاد نحسب للنهايات بحساب=أرواحنا لو تنعطى ما حسبنا
هذي سلوم العشق ناهب ونهاب=ياما نهبنا بالزمان ونهبنا
الليلة الطاروق موجوع ما طاب=مدري عيا وإلا عن الغي تبنا

المشاركة الأصلية كتبت بواسطة عبير الشوق (المشاركة 182556) صباح الإبدع .. دمت بخير استاذي ودام بك الشعر تقديري

المشاركة الأصلية كتبت بواسطة راع الأوله (المشاركة 182557) صح لسانك اكثر من رائعة مبدع لله درك

المشاركة الأصلية كتبت بواسطة القنـــــاص (المشاركة 182561) صح لسانك يا استاذ الابداع اكثر من شامخة تقبل التحية

المشاركة الأصلية كتبت بواسطة قوي البخت (المشاركة 182563) ابداع يتجدد لله درك ايها الشامخ

المشاركة الأصلية كتبت بواسطة أبو سعد (المشاركة 182569) قصيدة شامخة تستحق الاشادة صح لسانك راقت لي