نامت عيون اللي من الحب مرتاح....=ما جاء بباله يسهر الليل كله...
وأنا عيوني ساهرة لين الأصباح...=أوطي لهاجس وهاجس بشله...
الهم وسط القلب عيا لا ينزاح...=وأنا أشهد إن الهم للقلب عله...
عقب غياب صويحبي سكري ماح...=لهفي عليه معقبٍ(ن)فيّ خله...
الشوق يطعن بالحشا طعن الأرماح...=عرقٍ(ن)يجزه جز وأخر يتله...
ما عاد يهدأ بال من بعد ما راح...=حبل الأمل معقود يا صعب حله...
الوجد والحرمان والشوق ذباح...=سيفه لكل احساس فيني يسله...
حل الشقا بالقلب من بعد الأفراح...=مواجعي بالقلب ما هي مجله...
الليل كله متعبٍ(ن)نظم مسباح...=يا هب يا وقتٍ(ن)كمايه تذله...
عقبت في قلبي مواجيع وجراح...=الريق ناشف ما لقا ما يبله...
أون والخفاق من ونتي صاح...=بعد وليفه كل مجمول مله...
مثل مطيحي في هوى غايتي طاح...=هوى وليفي كل عرق إستحله...
غدى عزيز الدمع بالعين سفاح...=مثل السحاب الليل غشينه يهله...
الليل كله بارق الشوق لواح...=في هاجسي والناس كلٍ(ن)وخله...
نامت عيون اللي من الهم مرتاح....=وأنا عيوني تسهر الليل كله...