يا بنت ياللي جننتني مزاياك=عقلي وقلبي في غرامك تولع
حبك سكن بالقلب ما عاد ينساك=لو كان قلبي من بعادك توجع
ينبض بحبك والمشاعر تمناك=غلاك بعروقي حبيبي توزع
لا من ذكرت لشهد مغرق شفاياك=وانا بعيد القلب مني تلوع
دقات قلبي ترتفع عند ذكراك=النبض أحسه بالجسد صاير أسرع
يا ويل قلبي منك يا علي افداك=يا من على صدري بحبه تربع
أجمل هدايا العمر جتني هداياك=غديت للنابض شفيعٍ(ن)مشفع
يا عل كل البيض فدوة لماطاك=لو كان فيهن زين لكنك أروع
ما أظن بين البيض توجد حلاياك=يا سيدة قلب الحبيب المولع
فيك العذوبة والأدب لا عدمناك=وفيك الجمال اللي له القلب يركع
لقيتها ما عاد لي شف بسواك=قلبي عن الخثرات بابه تشمع
الله يرحم شيخ بالطيب رباك=وأنا أشهد إن الطبع غير التطبع
أدور في جوك مثل دور الأفلاك=والشوق منه القلب عرقه تقطع
أنا غرامي بالهوى مثل شرواك=بعطيك عمري وأنت لا شيء تمنع
أباك إيه أباك وأباك وأباك=أقولها من جد ماهي تصنع
في ذمتي ما شيء بالكون يسواك=حتى ولا حكم ملوك المربع
كل غاليٍ(ن)مهما غلي من فداياك=دام الخفوق اللي ملكته تطوع
ما هو بقا من عمر بقضيه برضاك=أمر على قلبي حبيبي تدلع
بعد غدت بي في طريقك مطاياك=سابع محال إني عن الحب برجع
اللي تبيه يصير ما دامي أهواك=إلا الجفا وإلا تقل لي توسع
هذي خطوطٍ(ن)حمر ما دونها جاك=أهون علي منها شراب المنقع
السم لو تأمر شربته لعيناك=موت الكرامة خير من عيشة أبشع
لا صرت أدور لك ولا يوم بلقاك=أبرك منه لو صارت الروح تنزع
البعد زايد صد بتساوي إهلاك=هذا عذاب وجرح صعب يترقع
لو صار هذا يا بعد من ترجاك=العذر وإلا الصلح ما عاد ينفع
يا بنت ياللي جننتني مزاياك=عقلي وقلبي في غرامك تولع