ليتك تعرف إني بدونك ولا شي=عايش ولا أدري كيف للحين عايش
وليتك تعرف إنك لي الشمس والفي=أنا بدونك مثل ما قيل طايش
وليتك تعرف إنك غناتي عن المي=وبدونك أعطش من كبودٍ(ن)عطايش
يكفيني من الغيث قطراتٍ(ن)شوي=من غيثك ليا مر لو هو رشايش
أحيا بها وقتي ولو معظمه سي=وإلا غزير القطر ما عدت نايش
يا حلمي اللي فات وبحاضر وجي=يا نور قلبي لو دونه درايش
ليت الأمر يا مشغل الروح بيدي=ما كان هذا الحال مهموم شايش
ميت وأنا محسوب في ناظرك حي=قيد القهر بالصدر مثل الغوايش
في ظلمة الأحزان عايش بلا ضي=الجاش من جور المواجيع جايش
أمد حبل الوصل والحظ يلوي=ما نلت من دنياك غير العرايش
بُعدك وحظي كاوية خافقي كي=كن الصبر مخلوط مره برايش
أيام عمري تنطوي يا غلا طي=العمر يركض والمكاسب بلايش
عايش بفقر الحب يا خي يا خي=أسهر من المغرب لوقت الغبايش
أبيع وأشري والسهر معظمه غي=أفكار تنبت مثل نبت الحشايش
أبني شوامخ مثل ما تبني دبي=وأهدها بالصبح تغدي طشايش
أسلي الخاطر بقافي ولو عي=أشعر معه ما أعيش عيشة هوايش
وليتك تعرف إني بدونك ولا شي=عايش ولا أدري كيف للحين عايش

المشاركة الأصلية كتبت بواسطة عبدالرحمن عويض المسعودي (المشاركة 179132) الله الله ابداااااع صح السااانك يابن هليل ويعطيك العااااااافيه تحيااااااااتي