عادت البسمات لشفاه العواطف=عقب عودة صاحبٍ(ن)طول غيابه
زانت الليلة وزانن السوالف=الله إنه يحفظ لخلي شبابه
زان لي ليلي بعد ما كنت عايف=راق فكري من حكي ولفي حكى به
إنتعش خفاق ما بين النحايف=ترقص الأفراح مع حضرة جنابه
ثم غنيت الشعر والقاف طارف=طيف خلي هاج شعري ثم سرى به
تجمح الأفكار في طاروق عاسف=للحبيب ولا على فكري رقابه
المعاني كاملة ماهي مناصف=مثل ما سيد الشعر كامل جوابه
مكتمل بالحُسن ما جا له مصادف=نادرٍ(ن)بالحسن لكن لا غرابه
كمله بالحُسن مُنزل بالمصاحف=تعشق لحسنه جواهره وثيابه
مثل ما قلبي لمضنوني موالف=فضله عن كل غالين وقرابه
المودة ما تجي حسب التعارف=الهوى يحتل قلبٍ(ن)مادرى به
لو تجي حسب التعارف بالمواقف=كان ضاع القلب ما يعرف صوابه
مير قلبي مالكه ولفه وعارف=صاحبٍ(ن)بالذوق والأشواق أذابه
يا حبيبي حالفٍ(ن)بالله حالف=إن حبك زاد قلبي ثم شرابه
ما تغيره الزوابع والعواصف=أنت للخفاق نوره ثم سحابه
الغلا بالروح يالمعشوق جارف=بالغياب وبالحضور الحب صابه
غابت البسمات بشفاه العواطف=يا خليلٍ(ن)طال بالدنيا غيابه