ياعين رمشك ليش زايد رفيف=قالت:تفكر بالزمان وخرابه
من كل حدب الناس جونا لفيف=من جوع وإلا من غرام وصبابه
بعض البشر نفسه مداها قصيف=ايضيق صدره من رحابة ثيابه
يمشي ويبصر مير عقله كفيف=اثر العماية بالخلائق تشابه
ممشاه من خوفه بجنب الرصيف=يخاف من ظله مسوي رقابه
خائف يقال فلان بالدرب شيف=ايلف وجهه عن غريب وقرابه
وأنا أشهد إن الناس فيهم ضعيف=وفيهم رجالٍ(ن)يشبهون الذيابه
وعقب الربيع يحل فصل الخريف=فصول تكسر بالنفوس الرتابه
واللي سكن جده جهل بالقطيف=شطين لكن بالمواني غرابه
ساحل تهامه ما صلح للمصيف=والطائف المانوس همجِ(ن)شرابه
ما عاد باقي بالمشارب نظيف=كل موردٍ(ن)بالأرض كاثر ذبابه
خير الوطن منهوب صابه نزيف=نزفٍ(ن)شديد ولا حسبنا حسابه
ما عاد نعرف متهم من شريف=ظني غدينا كلبونا عصابه
نذبح بعضنا عند لقمة رغيف=وقتٍ(ن)تغير والعقل ما هقا به
وخز الابر بالشامخ اللي منيف=نذير زلزالٍ(ن)يبعثر ترابه
واللي يمر ولا شعر بالمخيف=مريض عقل وصاب نفسه كآبه
قلته وأنا ماني لوقتي حليف=باب الطواري يا شعر فك بابه
قصيد شاعر في لحونه طريف=الشعر رمز وبعضنا ما درى به
كلام ساطي مثل حد الرهيف=مسنون من مقضبه لين الذبابه
يالله تلطف يالكريم اللطيف=كل ضلع مرقب فيه ذئبٍ(ن)عوى به
ياعين رفي وأكثر بالرفيف=دام الزمن ياعين زايد خرابه