يا قاهرة كل البنات الخراعيب=حشمتك عندي يالغلا فوق راسي
وياسيًدة كل الأهل والأجانيب=يأغلى من كنوز الجواهر وماسي
ياغصن موزٍ(ن)ميًلته الهباهيب=توه طري ما شاب عودك يباسي
يا طاهرة من كل عيب وعذاريب=مصيونةٍ(ن)ما قربت للدناسي
أنتي بحياتي طيب وأطيب من الطيب=يابعد روحي يا بعد كل ناسي
جئتك وفا ماجئتك مدور العيب=فتحت لك قلبٍ(ن)دفعه الحماسي
بنظم قصيدي فيك زين الرعابيب=كل ما خطرت بصيح وإلا تماسي
كتبت لك من دم قلبي مكاتيب=مشاعرٍ(ن)ما شابهن التباسي
تحمل حلوم كبار فيها تعاجيب=والظاهر إني كنت للروح ناسي
نسيت وجهٍ(ن)زينه زاير الشيب=ونسيت حالٍ(ن)خالطه بعض ياسي
نسيت بعض أحوال تمنع مواجيب=يانص عمري ما خلطك إقتياسي
صحيتني من وهم حسبته مصيب=لينت لي رأسٍ(ن)من الغي قاسي
لقيت قلبك للهوى فكه صعيب=عجزت به وأنا شديد المراسي
خيبت ظني في جميع المطاليب=حطمت بالممنوع رقمٍ(ن)قياسي
ما عاد به يا صاحبي شكه وريب=قلبٍ(ن)تعلق فيك جاه انتكاسي
شربت مر الصد شين المشاريب=ما يلحقك مشروه والكأس كاسي
ذيب الهوى بالصدر جر الأقانيب=سهل على ذيب الهموم إفتراسي
يعوي خفوقي داخلي كنه الذيب=في فج خالي ما سمع به حساسي
صوته يلج بصدر خاوي كما شعيب=في كهف ضلعٍ(ن)طول الأيام راسي
يا قاهرة كل البنات الخراعيب=حشمتك عندى يالغلا فوق راسي