نِعم الرجال اللي تمد المعاريف=والطيب في بعض المناعير عاده
والذيب يرقا فوق روس المشاريف=ما تصير عينه مثل عين الجراده
واللي يعاين بالزمان الملاقيف=حرام مايلزم زمام القياده
ومن لا يعرف الكيف ما يشرب الكيف=ومن لا يكيد الخصم يلبس قلاده
الفكر مثل البيع يحتاج تصريف=قال المثل:والنار تخر رماده
والشعر مثل الخيل يحتاج تعسيف=ولا كل خيالٍ(ن)يجود جواده
يابادع القيفان جزل المحاريف=تحتاج شاعر فيه راجح رشاده
والبحر ما ينقصه نسف المغاريف=والمجد ما يبلغه عاشق وساده
والبرد ما نخبره يقدم على الصيف=والحرب ما يشعله طافي زناده
لكن بعض الناس فيهم تخاريف=فيهم تعجل ما تحب الهواده
وإن جيت تنصحهم يجيهم عواصيف=معهم على قول الموصف قراده
مثل الهبوب اللي ثير السفاسيف=ما تثني اللي فيه صبر وجلاده
ياسيل ياللي تجرف الرمل تجريف=يحداك شامخ ماأنت قادر حياده
خلك على مجراك من غير تحريف=وإقتش قشع النبت وإلا خماده
الذيب يخطف بالحلال المطاريف=ولا ينهدم بيتٍ(ن)جويده وتاده
نِعم الرجال اللي تمد المعاريف=والطيب في بعض المناعير عاده

المشاركة الأصلية كتبت بواسطة سعيد مرزوق العبد (المشاركة 157054) الله الله صح السانك ياعم

المشاركة الأصلية كتبت بواسطة طارق العبيدي (المشاركة 157075) ابن هليل كعادته يتمتع بقوة اللفظ وجزالة المعنى صح الله لسانك ودام بالتقدم عطاؤك لك ودي وتقديري

المشاركة الأصلية كتبت بواسطة ابن عميش (المشاركة 157085) الله يعطيك الف عافيه قصيده رائعه من روائعك التي تعودنا على قوتها وكثافة شاعريتها وجزالة معانيها ...صح لسانك لك التحيه والتقدير

المشاركة الأصلية كتبت بواسطة رباح دبيان البيضاني (المشاركة 157096) اللي يلاحظ خطأ يعلمني وأنا له من الشاكرين مادام انك طلبت ممن يجد ملاحظه ان يذكرها .... وان دل ذلك على شي فهو يدل على ثقتك بنفسك . وياقل من يمتلك هذه الثقه .. اولآ : صح السانك ابدعت . يا ابا هليل . واليك ملاحظاتي . ارجو ان تتقبلها بصدر رحب . ويمكن انك الصائب وانا المخطي . واذا ترى ذلك ارجو اقناعي . واذا ملاحظاتي في محلها ارجو الأعتراف بذلك ..نِـعــم الـرجــال الــلــي تــمــد الـمـعـاريـف . انا اقول . لفظة تمد هنا خطاء . الصحيح اما. تعد المعاريف . او تعرف المعاريف.. -----------------مـعـهـم عـلــى قـــول الـمـوصـف قــــراده------------------------- كذلك هنا . المفروض . فيهم على قول الموصف قراده... وتقبل تحياتي

المشاركة الأصلية كتبت بواسطة binhlailبن هليــل (المشاركة 157099) صح بدنك ولا هنت أولا:المعروف مده للرجال كلمة دارجة ومعروفة عند الرجال ولكن عده او معرفته لا تفيد بعمله وفعله والفرق كبير بين أن تمد الشيء فينسب اليك فضله او تعده وتعرفه ولا تفعله اذا المد ابلغ لأنه يدل على الفعل وهو السائد شعبيا والأصوب ثانيا: ياذكي كلمة قرادة توصيف معنوي وليس حسيا.... نقول رجل فيه ذكاء او غباء ولا نقول معه ذكاء او غباء لأن مع تطلق على المصاحبة المحسوسة اي المعية مثل ما نقول: حضر رباح مع سعيد الا اذا قرادة دياركم تشوفونها بعيونكم أجل تختلف عن قرادتنا هههههههههههه وملاحظاتك على العين والراس وأرجوا أن تتقبل ردي بصدر رحب ثالثا:قواعد اللغة العربية الفصحى لا تنطبق على العامية علما بأن هنالك قاعدة شعرية تقول: يجوز للشاعر مالا يجوز لغيره وبالعامية مخالفاتنا كثيرة نطلق الجمع على المفرد للتعظيم ونطلق التذكير على التأنيث بالخطاب وهكذا ماقصرت يارباح ابيض وجه وأشكرك مدري منهو اللي استفاد انا والا انت والا كلانا ؟

المشاركة الأصلية كتبت بواسطة خالد سفر العتيبي (المشاركة 157113) هههههههههههههه لا يالربع والله توي ماطلعت من السجن بعدين انا ماغلطت لا تفهمون خالد خطى انا استشهدت من كلام ابن هليل يوم قال القصيده معرضه للنقد وذا الرجل عرضها فلا بد يتحمل النقد على القصيده واما هو على عيني يالربع ممعكم فاين والله حرام عليكم قسم بالله ماقصدي اللي فهمتوه ابن هليل انا اسف ولاعاد تقول انقدو قصيدي عشان متحذفني تكفى