الصاحب اللي زعله يسابق قدومه=احذر تبين له الخافي من أسرارك
مابين لحظة ولحظة يطوي هدومه=يرحل وينشر مع القاصين لأخبارك
ليا خف عقله غلطه مجهز سهومه=ماهي بتفرق معه قدره ومقدارك
لا تعطي السر غير لحاكم عزومه=بعد تعرف إن فكره جانس أفكارك
وإن كان شفت لمساه مخالف ليومه=قفل على جيب سرك وأوثق زرارك
لا تبتلش به ويبلش قومك وقومه=قرب مطاياك وإرحل وأعجل أسفارك
خلك صقر لاتسوي صنعت البومه=إعرف مواقيع مخلابك ومطيارك
لا ترتجي في مباني خبل مهدومه=مايعزك الا وطنك وربعك ودارك
إحذر وحاذر من أشياء غير مفهومه=حتى تبان الشواهد وأشعل لنارك
لا تضيع العمر في حاجات معدومه=وليا لزمت المقاضب حط منشارك
الرزق والعمر قبل تكون مقسومه=وليا رحلت البشر يحكون بأذكارك
اما دعوا لك وقالوا نفس مرحومه=والا تدعوا عليك وقلعة أشرارك