نامت عيونك ما درت عن عيوني=تسهر من المغرب ليا طلعة النور
كن الرموش مثبتة في جفوني=وكن المحاجر بينها جمر مسعور
أراقب الساعة تحرك بهوني=في ظن بالي عقرب الوقت ما يدور
أسج مع هاجس يراود ظنوني=وليا جمح جاني بداله مية شور
أذكرك وأذكر ناس عنك حدوني=وأذكر ظروفي والزمن يسر وعسور
وأرجع أصب الياس داخل لحوني=مر بشعور ومر ما حس بشعور
واليا إكتمل قافي وزانت فنوني=لقيت ودك بين الأبيات مسطور
القاك نبض الشعر تلهم جنوني=والقاك حس الحرف في كل منثور
أشكي على شعري جروح وشجوني=وأبكي على حالي ولو كنت مسرور
أخاف من سود الليالي تخوني=تبعدك عني بعد ما صرت لي نور
أخاف لا تتعب حوالك بدوني=وأخاف تحيا وأنت خاطرك مكسور
تهون روحي يا غلا ما تهوني=القلب منك اليوم منهي ومامور
أشوف طيفك من ورايه ودوني=يا مالكٍ(ن)كلي من سنين وشهور
على المشاعر والقصائد تموني=ما لوم فيك الفكر والحس معذور
من دونكم يا فاتني من أكوني؟=الا بقايا هم وجروح وشرور
حيثك ملكت الروح والله بعوني=أسهر من المغرب ليا طلعة النور

صحت أبدانكم جميعا سعدت بحضوركم وردودكم الطيبة


بارك الله فيكم


لكم خالص تحيتي